पेटभित्रको बच्चालाई ‘चमत्कार’ संज्ञा दिँदै प्रियंकाले भनिन्ः अब धेरै प्रतिक्षा गर्न सक्दिनँ

काठमाडौं । नायिका प्रियंका कार्की आफ्नो पहिलो बच्चाको पर्खाइमा छिन् । उनको व्यग्रता दिनानुदिन बढिरहेको छ, जुन सामाजिक सञ्जालमा उनले गर्ने पोष्टहरुमा झल्किन्छ ।

फेसबुक र इन्टाग्राममा उनी आफ्नो ठूलो भुडीसहितको फोटो दिनहुँजसो सार्वजनिक गरिरहेकी हुन्छिन् । युट्यूवमा भ्लगहरु पनि हाल्छिन् । उनका कतिपय क्रियाकलापलाई नौंटकी संज्ञा दिएर दर्शकले प्रशस्तै नकारात्मक कमेन्ट गरिरहेका छन् ।

केही दिनअघि प्रियंकाका निम्ति साथीहरुले ‘बेबी सावर’ को आयोजना गरेका थिए । अहिले उनका श्रीमान आयुष्मानले पनि पाँचतारे हाेटलमा छुट्टै ‘बेबी सावर’ आयोजना गरेका छन् ।

प्रियंकाले आयुष्मानसँग मुखमा चुम्बन गरेको तस्वीर सेयर गर्दै आफ्नो खुशी साटेकी छन् । उनले आफ्नो पेटमा हुर्किएको बच्चालाई ‘मिराकल’ अर्थात् चमत्कारको संज्ञा दिँदै उसलाई स्वागत गर्न व्यग्र रहेको उल्लेख गरेकी छन् ।
प्रियंका लेख्छिन्, ‘तिमीले मलाई प्रत्येक दिन हाम्रो जीवनको सबैभन्दा उत्कृष्ट वर्षहरु दियाै । हाम्रो चमत्कारलाई स्वागत गर्न अब धेरै प्रतिक्षा गर्न सक्दैनौं ।’

उनी थप्छिन्, ‘मभित्र एउटा जीवन हुर्किरहेको छ जुन प्रेम र खुशीले भरिएको छ, अनि नयाँ आशिर्वादका निम्ति तयार छ ।’