तेस्रो लहरको संक्रमण रोक्न सुदूरपश्चिममा पूर्वतयारी सुरु

कैलाली । दोस्रो लहरको कोरोना संक्रमण कम भइरहेको अवस्थामा तेस्रो लहरको संक्रमण नियन्त्रणको लागि सुदूरपश्चिममा तयारी सुरु भएको छ । प्रदेश सरकारले पनि तेस्रो लहरको कोरोनाको व्यवस्थापन गर्न सबै अस्पतालहरुमा परिपत्र गरेको छ ।

सेती प्रादेशिक अस्पतालले उक्त परिपत्र अनुसार प्रदेश सरकारसँग आवश्यक रकम माग गरेको छ ।

अस्पतालले तेस्रो लहरका बालबालिका बढी प्रभावित हुने प्रक्षेपण भइरहँदा उनीहरुको लागि उपचार कक्ष निर्माण र उपकरण जडान गर्न रकम माग गरिएको छ ।

अस्पतालले बालबालिकाका लागि आवश्यक पर्न सक्ने भन्दै एनआईसीयूका बेडको निर्माण र भौतिक संरचना तयार गर्ने काम गरिरहेको जनाएको छ ।

अस्पतालमा अहिले ९ शय्याको एनआईसीयूका रहेको छ । उक्त संख्या बढाएर २५ बनाउने लक्ष्य रहेको अस्पतालका सूचना अधिकारी दिलिप कुमार श्रेष्ठले जानकारी दिए ।

सामाजिक विकास मन्त्रालयले कम्तीमा ४० शय्याको व्यवस्था गर्न बनाउन परिपत्र गरेको छ । तर अस्पतालले ५० शय्यासम्मको व्यवस्था गर्ने तयारी गरेको छ ।

सामाजिक विकास मन्त्रालयले पनि प्रदेशमा तेस्रो लहरको लागि तयारी थलिएको बताएको छ । सामाजिक विकास मन्त्रालयका प्रवक्ता नरेन्द्र कार्कीले टिकापुर र महाकाली अस्पतालका नयाँ भवन निर्माण सुरु भइरहेको जनाएको छ ।

सेती अस्पतालमा निर्माणाधीन कोरोना अस्पतालमा अन्य कोरोनाका बिरामीलाई राखिने र पहिले तयार भइसकेको कोरोना अस्पतालमा बालबालिकाको लागि व्यवस्थापन गर्ने तयारी भइरहेको जनाएको जनाए ।

तयार भइसकेको कोरोना अस्पतालमा ५० शय्या रहेको छ भने प्रदेश सरकारले थप ५० शय्याको अस्पताल निर्माण गरिरहेको छ ।