सैनिक हवल्दारको हत्यामा संलग्न आरोपमा चितवनमा एकजना पक्राउ

चितवन । गोली लागेको अवस्थामा मृत भेटिएका सेनाको हत्यामा संलग्न आरोपमा चितवन प्रहरीले एकजनालाई पक्राउ गरेको छ ।

अनुसन्धानको क्रममा रहेको भन्दै प्रहरीले पक्राउ परेका व्यक्ति तथा थप विवरण भने खुलाउन चाहेको छैन । महेन्द्र दल गण राष्ट्रिय निकुञ्ज टोखा काठमाडौंमा कार्यरत ३६ वर्षीय भरत गुरुङ बिहीबार बिहान सिमलडाँडा घोलमा मृत भेटिएका थिए ।

चितवन प्रहरीका प्रवक्ता सूर्यबहादुर थापाका अनुसार धादिङ नीलकण्ठ नगरपालिका घर भएका उनी सेनाको हवल्दार हुन् । घटनास्थलमा गोलीको खोकासमेत फेला परेको थियो । दाहिने कान र देब्रे कानमा चोट देखिएका गुरुङको गोली हानेर हत्या गरिएको प्रहरीको प्रारम्भिक अनुसन्धानबाट खुलेको छ ।