गर्भवती भएको हल्ला फैलिएपछि आँचललाई ‘बधाई’को हैरानी !

काठमाडौ । अभिनेत्री आँचल शर्मा र उनका पति उदिप अहिले यतिबेला भिन्न तनावमा छन् । आँचल गर्भवती बनेको खबर फैलिएपछि यो दम्पत्तिलाई बधाईको ओइरो लागेको छ । हुँदै नभएको कुरामा बधाई खानुपरेपछि उनीहरुलाई अहिले हैरानी भएको छ ।

बुधबार कमेडी च्याम्पियनमा पाहुना बनेर गएका आँचल र उदिपले यो हैरानी मिडियासामु सार्वजनिक गरे । यति सम्मकी मिडियामा आँचल र उदिपले सन्तानलाई जन्म दिन लागेको खबर फैलिएपछि यो हल्लाको शिकार आँचलका ससुरा समेत भएका रहेछन् ।

‘मलाई केही पनि थाहा थिएन । एकदिन मलाई उदिपजीको बुवाको फोन आयो । उहाँले बधाई भन्नुभयो । मलाई सुरुमा लाग्योे एनिभर्सरीको बधाई होला भन्ने । तर, कुरा गर्दै जाँदा बुवाले अर्कै कुरामा बधाई भन्नुभएको रैछ’ आँचलले भनिन्, ‘सुरुमा मख्ख भएर फोन गर्नु भएपनि उहाँ पछि निराश हुनुभयो ।’

आफ्ना आफन्त र साथीभाई पनि यो कुराले निराश भएको दुःखेसो आँचल दम्पत्तिले पोखे । ‘भयो भने हामी हामी आफै भन्छौं’ उदिप र आँचलले एक स्वरमा मिडियासँग भने । अनि मम्मी चाहिँ कहिले बन्ने त ? आँचलको जवाफ छ, ‘आमा बन्नैपर्छ एकदिन । मलाई पनि मन छ महिला भएको हिसाबले । राइट टाइममा भै नै हाल्छ ।’ करियर र परिवारलाई ब्यालेन्स मिलाएर अघि बढ्ने आँचलले जवाफ दिइन् ।