कोरोना संक्रमण बढ्न थालेसँगै काठमाडौंका अस्पतालहरु बिरामीले भरिभराउ

काठमाडौं । पछिल्लो केही दिनयता काठमाडौं उपत्यकाका अस्पतालहरु कोभिड–१९ का बिरामीले भरीभराउ भएका छन् । स्वास्थ्य तथा जनसंख्या मन्त्रालयका अनुसार कोरोना संक्रमणदर वृद्धिसँगै अस्पतालका शैय्याहरु भरिन थालेका हुन् ।

मन्त्रालयको आजको तथ्यांकअनुसार पछिल्लो केहिदिनमा कोरोनाका बिरामीहरु आईसीयू र भेन्टिलेटरमा भर्ना हुनेको संख्या बढीरहेको छ । संक्रमितको संख्या बढ्दै जाँदा उपत्यकामा रहेका अस्पतालको शय्याहरु भरिँदै गएका छन् ।

बिहीबार २ बजेसम्मको तथ्यांकअनुसार वीर अस्पतालमा १५३ जनाको क्षमता भएको एचडीयूमा ७४ जनाको उपचार भइरहेको छ । यस्तै ३५ जनाको क्षमता रहेको आईसीयूमा १७ जनको उपचार भइरहेको छ भने १० जनाको क्षमता रहेको भेन्टीलेटरमा हाल ७ जना उपचाररत छन् ।

कोरोनाको तेस्रो लहरको तयारीमा आईसीयू १०० वटा, भेन्टिलेटर १०० वटा, एचडीयू बेड १०० वटा अक्सीजन प्लान्टको तयारी अवस्थामा रहेको वीर अस्पतालका डा. अच्यूत कार्कीले बताए ।

शुक्रराज ट्रपिकल तथा सरुवा रोग अस्पतालमा कोभिडका लागि छुट्याइएको बेडहरु भरिन थालेका छन् । अस्पतालमा १०० जना क्षमतामा रहेको एचडीयू बेडमा ४७ जनाको उपचार भइरहेको छ । यस्तै २८ जनाको क्षमता रहेको आईसीयूमा १९ जनको उपचार भइरहेको छ भने २२ जनाको क्षमता रहेको भेन्टीलेटरमा हाल १५ जना उपचाररत रहेको स्वास्थ्य मन्त्रालयको तथ्यांकमा छ ।

त्रिवि शिक्षण अस्पतालमा कारोना संक्रमणका विरामीहरु धमाधम बढ्न थालेका छन् । अस्पतालमा १४५ जना विरामीको उपचार भइरहेको छ । जसमा ३३९ जना क्षमतामा रहेको एचडीयू बेडमा ९८ जनाको उपचार भइरहेको छ । यस्तै ५१ जनाको क्षमता रहेको आईसीयूमा ३३ जनको उपचार भइरहेको छ भने ३१ जनाको क्षमता रहेको भेन्टीलेटरमा हाल १४ जना उपचाररत रहेको स्वास्थ्य मन्त्रालयको तथ्यांकमा छ ।

भक्तपुर अस्पतलमा ७३ जना क्षमतामा रहेको एचडीयू बेडमा १९ जनाको उपचार भइरहेको छ । यस्तै ६ जनाको क्षमता रहेको आईसीयूमा ४ जनाको उपचार भइरहेको छ भने ४ जनाको क्षमता रहेको भेन्टीलेटरमा हाल ३ जना उपचार भइरहेको छ ।

पाटन अस्पतालमा २७० जना क्षमतामा रहेको एचडीयू बेडमा ९५ जनाको उपचार भइरहेको छ । यस्तै ३० जनाको क्षमता रहेको आईसीयूमा २५ जनको उपचार भइरहेको छ भने १५ जनाको क्षमता रहेको भेन्टीलेटरमा हाल ९ जना उपचार भइरहेको स्वास्थ्य मन्त्रालयको तथ्यांकमा उल्लेख छ । तथ्यांकअनुसार अस्पतालमा कोभिडका बिरामीहरुको संख्या बढ्दै गएको पाईएको छ ।