तस्बिरमा हेलम्बु भीमथाङको पहिरो

काठमाडौं । शनिबार रातिदेखि आएको बाढीले सिन्धुपाल्चोकको हेलम्बु र मेलम्चीमा थप क्षति पुर्‍याएको छ । हेलम्बु गाउँपालिका- १ भीमाथाङ लगायतका विभिन्न ठाउँमा पहिरो खसेर नदी थुनिएकाले फेरि बाढी आएको गाउँपालिकाले जनाएको छ ।

बाढीलेचनौटेको रातो पुल बगाएको छ । वाढीले आज विहान पुल बगाएको हो । मेलम्ची– ७ र ८, पाँचपोखरी– १ र २ र हेलम्बुका धेरै वडा जोड्ने एकमात्र विकल्पका रुपमा यो पुल रहेको थियो । पुल बगाएसँगै अब यो भेगमा सवारीआवतजावत बन्द छ ।

त्यस्तै ग्यालथुममा रहेको झोलुङ्गे पुल पनि वाढीले बगाएको छ । बाढीले धार परिवर्तन गरेर तालामाराङ प्रहरी चौकीको भान्छा पनि बगाएको छ । मेलम्ची बजारदेखिमाथि पुल बाँकी नरहेको हेलम्बु गाउँपालिकाका अध्यक्ष निमा ग्यालजेन शेर्पाले जानकारी दिए ।

खोलामा लेदोसहितको बाढी आएको र बाढी घट्ने, बढ्ने भइरहेको उनले बताए । गत असार १ गते हेलम्बु १ भ्रेमाथाङमा खसेको पहिरोले नदी थुनिएर ठूलो क्षति भएको थियो ।

यसपटक पनि भीमाथाङमा पहिरो गएर नदी थुनिएर बाढी आएको अनुगमनमा पुगेका हेलम्बु गाउँपालिका का अध्यक्ष शेपाले जानकारी दिए । सडक सञ्जाल टुटेकाले हेलिकप्टरबाट बाढी गएको ठाउँको अनुगमन गर्न पुगेका थिए ।

उनका अनुसार विभिन्न स्थानमा पहिरो खसिरहेको र सोही कारणले नदी थुनिएकाले बाढी आएको हो । शनिबार रातिदेखि मेलम्चीका खोलामा बाढी आएको छ ।

हेलम्बु गाउँपालिकाको र मेलम्ची नगरपालिकाका १७ घर टहरा बगाएको छ । ती मध्ये नौ पक्की र आठ कच्ची रहेको जिल्ला प्रहरी कार्यालयका प्रहरी उपरीक्षक राजन अधिकारीले जानकारी दिए ।
गत असार १ गते आएको भीषण बाढीले लेदो भरिएका घर गएरातिको बाढीले बगाएको हो । ती घरटहरा खाली थिए ।

तस्बिर  साैजन्य :  हेलम्बु गाउँपालिकाका अध्यक्ष  निमा ग्याल्जेन  शेर्पा