मोटरसाइकल चोरीमा संलग्न ३ जना प्रहरीको नियन्त्रणमा

काठमाडौं । महानगरीय ट्राफिक प्रहरी महाशाखाले भक्तपुरबाट २ वटा पल्सर मोटरसाइकलसहित चोरीमा संलग्न ३ जनालाई पक्राउ गरेको छ । भक्तपुर सरस्वतीखेलका बासुदेव खड्काको आफ्नै घर अगाडिबाट २०७६ सालमा हराएको उक्त मोटरसाईकलसहित रामेछाप घर भई हाल भक्तपुर बस्ने १९ वर्षीय दिपेन्द्र भुजेल र ताप्लेजुङ्गका १९ वर्षीय बिशेष लिम्बु पक्राउ परेका हुन ।

बा९७प १३०५ भएको कालो, रातो रङको १५० सी.सीको उक्त पल्सर मोटरसाईकलको नम्बर परिवर्तन गरी बा९५प ४१६८ भएको अबस्थामा ट्राफिक टोलीले पक्राउ गरेको महाशाखाले जनाएको छ ।

ट्राफिक प्रहरीले थप अनुसन्धान गरि पशुपति क्षेत्रबाट हराएको किर्तिपुर बस्ने प्रशान्त रावलको बा९६प ८८३६ नं को कालो एनएस पल्सरको बास्तबिक नम्बर परिवर्तन गरी बा९१प ८६७२ नम्बर प्रयोग गर्दै गरेको अवस्थामा धनुषाका २१ वर्षीय बिकल थापालाई समेत भक्तपुरबाटै नियन्त्रणमा लिएको हो ।

चोरीमा संलग्नहरुलाई पक्राउ गर्न परिचालित टोलीले एक हप्तादेखिको निरन्तर सुचना संकलन र निग्रानी पश्चात हिजो साँझ पल्सर मोटरसाईकल सहित भक्तपुरबाट तीनैजनालाई पक्राउ गर्न सफल भएको र अन्य संलग्नहरुको समेत सुचना संकलन गर्ने र खोजतलास गर्ने कार्य भईरहेको ट्राफिक प्रहरीले बताएको छ ।

पक्राउ परेको मोटरसाइकलसहित तीनै जनालाई थप अनुसन्धान एव कानूनी कार्बाहीको लागि प्रहरी बृत्त ठिमीमा बुझाएको समेत ट्राफिक महाशाखाले जनाएको छ ।