‘अंगरक्षक आउने आशामा उहाँ मारिनुभयो’

सीएनएन । गतमहीना आफ्नै शयनकक्षमा जब हाइटीका राष्ट्रपति निर्ममतापूर्वक मारिँद थिए, एक मात्र प्रत्यक्षदर्शी त्यहाँ थिइन् । घटनाबारे उनलाई जति राम्रोसँग थाहा छ, अरुलाई छैन ।

जुलाई ७ मा मार्टिन मोइज आफ्ना पति जोभेनेल मोइजको शवसँगै रगत बगिरहेको बेला त्यही शयनकक्षमा अर्को बिहान भेटिएकी थिइन् । रहस्यमयी हत्याबाट उनी बाँचिन् तर, हत्यारालाई न्यायको कठ्घरामा ल्याउनुपर्ने भन्दै सुरु भएको खोजीमा उनले आवाज उठाएकी छिन् ।

आइतबार दक्षिणी अमेरिकी राज्य फ्लोरिडामा सीएनएसँग अन्तर्वार्ता दिँदै गर्दा मोइजले पाखुरामा कालो पट्टी बाँधेकी थिइन् । उनको माग थियो –हत्यारालाई पत्ता लगाएर घटनाबारे छानविन गर्नुपर्छ भन्ने हो ।

‘कसैले आदेश दियो र कसैले पैसा । हामीले तिनै मान्छेको खोजी सुरु गरेका छौं । ती मान्छेलाई पत्ता लगाउन मलाई राष्ट्रसंघीय सुरक्षा परिषद्को सहयोग चाहिएको छ’ मोइजले भनिन् ।

मोइज आफ्ना पति हत्याकी एकमात्र प्रत्यक्षदर्शी हुन् । राष्ट्रपतिय कक्षभित्र प्रवेश गरेर गोली प्रहारको घटना मच्चाउने क्षणकी एक पीडित पनि हुन् । राती १ बजे आफ्नो घरमा स्वचालित राइफल पड्किएको आवाज सुनेपछि मोइज दम्पत्तिलाई लागेको थियो– चीज ठीक भैरहेको छैन ।

जब उनीहरुलाई थाहा लाग्यो बन्दुकधारी घरभित्रै पस्दैछन्, तब उनीहरु खाटमुनि पसेर लुक्ने प्रयास गरे ।

हाइटीको राष्ट्रपति कार्यालयका नेपाली अधिकारी भन्छन् : यहाँ अहिले सरकार, सेना, संसद केही छैन

‘त्यतिबेला मलाई लागेको थियो, उनीहरु हाम्रो शयनकक्षमै पसेर आक्रमण गर्न सक्दैनन् भन्ने किनभने हामीसँग ३० देखि ५० जना अंगरक्षक थिए घरमा’ उनले स्मरण गरिन् ।

हाइटीका अधिकारीहरुले जवाफै दिन नसक्ने गरी एउटा ठूलो सुरक्षा असफलता थियो । दुईजना उच्च सुरक्षा अधिकारीहरु अहिले पनि जेलमा छन् । जब उनी गोली लागेर भुइँमा ढलेकी थिइन्, उनको काँध भाँचिएको थियो र रगत बगिरहेको थियो, उनी आक्रमणकारीलाई उसको जुत्ताबाट मात्र चिन्न सक्छिन् । उनलाई लाग्छ, केही खास कुरा खोज्दै स्पेनी भाषा बोल्ने दर्जन आक्रमणकारी कोठाभित्रै छिरेका थिए ।

‘उनीहरु कोठाभित्रै स्पेनी भाषामा त्यो होइन, त्यो होइन भन्दै छिरिरहेको सुनेँ । यसको अर्थ, उनीहरु आफूले खोजेको कुरा पाएका छन् ।’

त्यसपछि उनीहरु राष्ट्रपतिको ठाउँमा आए र कतै फोन गरे, उनले त्यो दुःखदायी क्षण सम्झिइन् ।

‘त्यो समय उहाँ जीवितै हुनुहुन्थ्यो । उनीहरुले उहाँ अग्लो, पातलो र कालो वर्णको भएको सुनाए । हुनसक्छ, फोन गरिरहेको मान्छेले हुलिया निश्चित भएपछि गोली हान्न आदेश दियो । त्यसपछि उनीहरुले गोली हाने’ उनले घटनाको वर्णन गरिन् ।

प्रारम्भिक अध्ययन अनुसार राष्ट्रपतिको अनुहारमा १२ राउन्ड गोली हानिएको थियो । अनुहार, खुट्टा र पाखुरामा गोलीका प्वालहरु थिए ।

‘जब उनीहरुले राष्ट्रपतिलाई गोली होन, मैले सोचेँ, अब हामी दुबैजना मारिने भयौं’ उनले भनिन्, ‘अनि मैले आँखाहरु बन्द गरेँ, मैले अरु केही पनि सोचिँन । मैले सोचँे, हाम्रो लागि अन्तिम दिन आज हो’ उनले स्मरण गरिन् ।

‘हाइटीमा केही मान्छेहरु छन् जो निकै शक्तिशाली छन् । अहिलेको छानविनले घटनाबारे सत्यतथ्य छानविन गर्छ भनेर म विश्वस्त छैन’ मोइजे भन्छिन् ।

तत्कालका लागि हाइटीकी फस्ट लेडीको प्राथमिकतामा आफ्ना सन्तानको स्याहार गर्नु र आफ्नो स्वास्थ्यमा ख्याल गर्नु हो । साथै, हाइटीको घटनाबारे छानविन गर्न अन्तर्राष्ट्रिय सहायता जुटाउनु हो ।