११ जना महिलाले यौन दुर्ब्यबहारको आरोप लगाएपछि न्यूयोर्क गभर्नरलाई राजीनामा दिन राष्ट्रपति बाइडनको आग्रह

न्यूयोर्क । ११ जना महिलाले यौन दुर्ब्यबहारको आरोप लगाएपछि न्युयोर्कका गभर्नर एन्ड्रयु कुमोमाथि राजीनामा दिन चौतर्फी दबाब परिरहेको छ । राष्ट्रपति जो बाइडनले समेत राजीनामा दिन कुमोलाई आग्रह गरेका छन् । ह्वाइट हाउसमा पत्रकारहरुसँग कुरा गर्दै कुमोले राजिनामा दिनुपर्ने बाइडेनले बताएका हुन् ।

यदि कुमोले राजीनामा नदिएको परिस्थितीमा कसरी हटाउन सकिन्छ भन्नेबारे राष्ट्रपति बाइडनले राज्य संसदले महाभियोगबारे निर्णय गर्नसक्ने आफ्नो बुझाई रहेको बताए । न्युयोर्क राज्यको प्रतिनिधिसभा स्पीकर कार्ल हेइस्टीले गर्भनरमाथिको महाभियोग सोधपुछ छिट्टै टुंगो लगाउने जनाएका छन् ।

कुमोमाथि ११ जना महिलाहरुले विभिन्न समयमा आफूहरुमाथि यौन दुर्ब्यबहार गरेको आरोप लगाएका छन् । राज्यको एटोर्नी जनरल लेटिसिया जेम्सको अफिसबाट सार्वजनिक रिपोर्टमा कुमोले धेरै महिलामाथि यौन दुब्र्यबहार गरेको साथै राज्य र संघीय कानूनको उल्लंघन गरेको उल्लेख गरिएको छ । कुमोले आफूबिरुद्धका कैयन अभियोगहरुको सशक्त प्रतिवाद गरेका छन् । उनले आफ्नो व्यहारको गलत व्याख्या गरिएको बताएका छन् ।

कुमोविरुद्ध प्रस्तुत १६५ पृष्ठ लामो प्रतिवेदनमा १७९ जना प्रत्यक्षदर्शीको बयान समेटिएको छ । दशौं हजार कागजातहरु पनि समेटिएको छ । कुमोले दुव्र्यहार गरेको भनिएकामा आफ्नै कार्यालयका कर्मचारीहरु, सर्वसाधारणहरु, राज्यका अन्य कर्मचारी छन् ।