विमला वलीमाथि हकदावी गर्न एमाले र माओवादीको प्रतिस्पर्धा

रूपन्देही । लुम्बिनी प्रदेशकी सांसद विमला वलीको तानातान रोकिएको छैन । कहिले माओवादी त कहिले एमालेमा रहेको बताउने गरेकी वली आज पुनः माओवादी संसदीय दलको कार्यालयमा आएको र केहीबेरमा पत्रकार सम्मेलन गर्ने दावी माओवादी केन्द्रका नेताहरुले गरे लगत्तै उनी एमालेमै रहेको अर्को पक्षले दावी गरेको छ ।

विमला वली पुनः माओवादीमा गएको सत्य नभएको एमालेले दावी गरेको छ ।

एमाले संसदीय दलका सचेतक भुमिश्वर ढकालले विमला वली एमालेमै रहेको बताए । मंगलबार माओवादीबाट एमालेमा आएको विज्ञप्ति सार्वजनिक गरेकी ओली बुधबार माओवादी संसदीय दलको कार्यालय पुगेको समाचार आएपनि एमालेले त्यसो नभएको दावी गरेको हो ।

यो विषयमा माओवादीका नेताहरूले आफूहरू आन्तरिक बैठक मा भएकोले पछि कुरा गर्ने भन्दै फोन काट्ने गरेका छन् । वली आफैं भने अहिलेसम्म पत्रकारसमक्ष वा अन्यत्र सार्वजनिक भएकी छैनन् ।

माओवादी केन्द्रले उनी एमाले प्रवेश गरेको पुष्टी भए सांसदबाट पदमुक्त गर्ने चेतावनी दिएलगत्तै उनको बारेमा पुनः चर्चा शुरू भएको छ ।