लुम्बिनी प्रदेशमा खोरेत रोग नियन्त्रणबारे छलफल

रुपन्देही । लुम्बिनी प्रदेशको पशुपंक्षी तथा मत्स्य विकास निर्देशनालयले पशुमा लाग्ने खोरेत रोग नियन्त्रण अभियानको विषयमा छलफल गरेको छ । स्थानीय तहका प्रमुख तथा प्रतिनिधिहरु, प्रदेश मातहतका सम्बन्धित निकायका कार्यालय प्रमुख, किसान र सरोकारवाला निकायका प्रतिनिधिहरुको गोष्ठीमा सहभागिता रहेको थियो ।

कार्यक्रममा प्रदेशको भुमि व्यवस्था, कृषि तथा सहकारी मन्त्री आरती पौडेलले पशु चौपायमा देखिने खोरेत रोग नियन्त्रण, उन्मुलन र रोकथामका लागि प्रदेश सरकारले लागिपरेको बताएका छन् ।

प्रदेश सरकारको एकल प्रयासले मात्र खोरेत रोग उन्मुलन सम्भव नभएकाले संघीय र स्थानीय सरकारको साथ चाहिने बताए । खोरेत रोग नियन्त्रण र उन्मूलनका लागि सम्भावित क्षेत्रमा कडा चेकजांच गरिनुपर्ने उल्लेख गर्दै पूर्व तयारी स्वरुप प्रदेशका तराई क्षेत्रका ६ जिल्लामा खोप अभियान थालनी गरिने उनले बताए ।

लुम्बिनी प्रदेश भूमि व्यवस्था, कृषि तथा सहकारी मन्त्रालयका सचिव डा. रेवतीरमण पौडेलले किसानको समस्या नै सरकारको समस्या भएको भन्दै सम्भावित रोग रोकथामको लागि पूर्वतयारी गर्ने काम तीब्ररुपमा अगाडि बढेको बताए।