उदयपुरकी कृशला हत्याको छानविन छिटो गर्न प्रदेशसभामा माग

काठमाडौं । उदयपुरको त्रियुगा नगरपालिका- ६ की १६ वर्षीया कृशला चौधरीको एसिड प्रयोग गरेर हत्या गरिएको भन्दै प्रदेश १ सभामा घटनाको छानविन र कारवाहीमा प्रहरीले ढिलासुस्ती गरेको कुरा उठेको छ ।

प्रदेशसभा सदस्य सुनीताकुमारी चौधरीले कृशलालाई चुरे जंगलमा एसिड हानेर हत्या गरिएको दावी गरिन् । ‘अनुसन्धानमा प्रहरीले चासो देखाएको छैन । तत्काल दोषीलाई कडाभन्दा कडा कारवाही गर्न माग गर्दछु ।’

८ दिन अघि हराएकी चौधरीको उदयपुर त्रियुगा नगरपालिका-६ स्थित मोहनपुर जंगलमा शव भेटिएको थियो । उनको हत्यामा संलग्न आशंका तीनजना पक्राउ परेका छन् ।

फरक प्रसंगमा सांसद चौधरीले फ्रिफायर र पब्जीका कारण विद्यार्थीहरू बिग्रिएको भन्दै यस्ता खेलहरूमा प्रतिबन्ध लगाउन माग गरिन् ।
उनले भनिन्,’सरकार युवाहरूलाई रोजगार देऊ । पब्जी र फ्रिफायरमा नुभुलाऊ ।’