युद्ध अब सकियो, शान्तिपूर्ण अन्तर्राष्ट्रिय सम्बन्धतर्फ केन्द्रित हुन्छौं : तालिवान प्रवक्ता

काबुल । आफना लडाकुले राजधानी कब्जामा लिएको र राष्ट्रपति नै देश छाडेर भागेको परिस्थितीमा अब लडाईको अन्त्य भएको तालिवानले घोषणा गरेको छ ।

अलजजिरासँग कुरा गर्दै तालिवान प्रवक्ताले अब लडाइ लड्नु जरुरी नभएको बताएका हुन् । तर, हतियारधानी तालिवान लडाकुले सत्ता आफ्नो आफ्नो हातमा लिएपछि राजधानी काबुलमा त्रासका दृश्यहरु व्याप्त छन् । काबुल विमानस्थलमा देश छाड्न चाहनेको भीड छ र पृष्ठभूमिमा गोली पड्किएका आवाज सुन्न सकिन्छ ।

तालिवानको राजनीतिक विभागका प्रवक्ता मोहम्मद नहिमले आफूहरु अब अलग भएर बस्न नसक्ने र चाँडै नयाँ सरकार गठन हुनसक्ने बताएका छन् । उनले शान्तिपूर्ण अन्तर्राष्ट्रिय सम्बन्ध चाहेको समेत बताए ।

‘धन्यवाद भगवान, अब युद्ध सकिएको छ’ उनले अलजजिरासँग भने ।

‘हामीले जे चाहेका थियौं त्यो पाएका छौं । जुन हाम्रो देश र नागरिकको स्वतन्त्रता पनि हो । हामी कसैविरुद्ध हाम्रो भूमि प्रयोग गर्न अनुमति दिँदैनौं हामी अरुलाई दुःख पनि दिन चाहन्नौं’ उनले भने ।