चीनबाट आज र भोलि १६ लाख डोज भेरोसेल खोप आइपुग्दै, जापानबाट शनिबार ७ लाख डोज ल्याइँदै

काठमाडौं । चीनबाट आज आठ लाख डोज भेरोसेल खोप आउने भएको छ। खरीद प्रक्रियामार्फत ल्याउन लागिएको ६० लाख डोज खोपमध्ये बुधबार र बिहीबार गरी १६ लाख डोज खोप ल्याउन लागिएको हो ।

स्वास्थ्य सेवा विभागका अनुसार आज आठ लाख र भोलि आठ लाख डोज खोप आइपुग्नेछ । बाँकी ४४ लाख डोज खोप अगस्ट अन्तिम साता आइपुग्ने महाशाखाले जनाएको छ। जापानले कोभ्याक्स संयन्त्रमार्फत उपलब्ध गराएको १६ लाख डोज खोपमध्येको बाँकी ७ लाख डोज भदौ ५ र ७ गते आइपुग्ने मन्त्रालयका प्रवक्ता कृष्ण पौडेलले जनाए ।

अहिलेसम्म २४ लाख ४८ हजार कोभिसिल्ड, ५८ लाख डोज भेरोसेल, १६ लाख डोज जोन्सन एन्ड जोन्सन, १० लाख ७७ हजार ३२० डोज अस्ट्राजेनेका गरी १ करोड ८ आठ लाख ६० हजार १७० डोज खोप नेपाल आइपुगेको छ ।

३४ लाख ९० हजार ६६५ जनाले कोभिडविरुद्धको पूर्ण खोप लगाएका छन् भने ४६ हजार १६ हजार ९३६ जनाले पहिलो मात्रा लगाएका छन्।