सबै अमेरिकीलाई बाहिर निकालेपछि मात्रै काबुलबाट सेना फिर्ता हुने बाइडेनको भनाई

एजेन्सी । अमेरिकी राष्ट्रपति जो बाइडेनले अफगानिस्तानबाट आफ्ना नागरिक बाहिर ननिकालेसम्म अमेरिकी सेनाले काबुल नछाड्ने बताएका छन् ।

बुधबार प्रशारित एबीसी न्युजसँगको अन्तर्वार्ताका क्रममा उनले सबै अमेरिकी नागरिकलाई अफगानिस्तानबाट बाहिर ल्याउन सरकार प्रतिबद्ध रहेको बताए । सबैलाई बाहिर निकाल्नका लागि ३१ अगष्टको समयसीमा बढाउन पनि सकिने उनको संकेत थियो । अमेरिकाले यो वर्षको अगष्ट ३१ भित्र आफ्ना सबै सेना अमेरिका फिर्ता लाने यसअघि नै निर्णय गरेको थियो ।

‘सबै नागरिकले के बुझ्नुपर्छ भने हामी यही अगष्ट ३१ अगाडि नै सबैलाई ल्याउने प्रयासमा छौं,’ बाइडेनले भनेका छन्, ‘यदि भ्याइएन भने एक जनामात्रै अमेरिकी नागरिक रहेसम्म हामी फर्किने छैनौं । फसिरहेका आफ्ना नागरिक छाडेर अमेरिकी सेना फर्किनै सक्दैन ।’

१० देखि १५ हजार अमेरिकी नागरिक अझै पनि अफगानिस्तानमा रहेको अनुमान गरिएको छ । बाइडेनका अनुसार अमेरिकी मिसनलाई सहयोग गरिरहेका ५० देखि ६५ हजार अफगानी नगरिकले पछि देश छाड्न चाहेको बताए ।