घानीलाई युएईले दियो आश्रय, पैसा लगेको भन्ने आरोपको खण्डन

काबुल । तालिवानले सत्ता कब्जा गरेपछि देश छाडेका अफगान राष्ट्रपति असरफ घानीले संयुक्त अरब एमिरेट्समा आश्रय लिएका छन् । गल्फ नेसन एजेन्सीका अनुसार युएईले मानवीय आधारमा घानीलाई आश्रय दिएको जनाएको छ ।

युएई विदेश मन्त्रालयले मानवीय आधारमा घानी र उनको परिवारलाई आश्रय दिएको जनाएको छ । तर, बुधबारको भिडिओ सम्बोधनमा घानीले आफूले देश छाड्ने कुुरालाई अस्वीकार गरेका थिए ।

‘अहिले म युएईमा आइपुगेको छु । यसले रक्तपात र थप अस्थिरतालाई रोकेको छ । मैले ठूलो रकम लिएर देशबाट भागेको कुरा पूर्णतः गलत छ’ घानीलाई उध्दृत गर्दै अरब न्यूजले लेखेको छ ।

७२ वर्षिय घानीले संकटमा देश छाडेको भन्दै निकै आलोचना खेपिरहेका छन् । गत सोमबार अमेरिकी राष्ट्रपति जो बाइडेनले पनि अफगान सरकारको आलोचना गरेका थिए ।

युएईले निर्वासित नेतालाई आश्रय दिएको यो पहिलोपटक भने होइन, यसअघि पाकिस्तानी प्रधानमन्त्री बेनजिर भुट्टोलाई पनि युएईले आश्रय दिएको थियो ।