ब्यूटी केयर शुभारम्भ गर्दै करिश्माले भनिन् : मेरो सौन्दर्यले अभिनयलाई ओझेलमा पारेको छैन

काठमाडौं । नायिका करिश्मा मानन्धरको चर्चा अभिनयसँगै सौन्दर्यलाई लिएर बढी हुने गरेको छ । कामसँगै उनको सौन्दर्यको प्रशंसा सँधै हुने गर्छ । यो उमेरमा पनि उनी फिट एन्ड फाइन देखिन्छिन् ।

शनिबार राजधानीमा आयोजित एक कार्यक्रममा करिश्माले आफ्नो सौन्दर्यले अभिनयलाई छायाँमा नपारेको बताइन् । ‘मैले फिल्म क्षेत्रमा निकै लामो यात्रा गरेँ । यो सौभाग्य कमैले पाउँछन् । म त्यो भाग्यमानी कलाकार हुँ । अनि मैले कसरी सुन्दरताकै कारण यति लामो यात्रा गरेँ भन्न मिल्छ रु’ सौन्दर्यले अभिनयलाई छायाँमा नपारेको करिश्मा तर्क छ ।

आफू सुन्दरताले मात्र नटिकेको करिश्मा कथन छ । ‘सुन्दरता भन्ने सँधै रहन्न । कलाकारले अभिनयलाई प्रखर बनाउँदै लैजानुपर्छ’ करिश्मा भन्छिन् । शनिबार उनले युनिसेक्स ब्युटी पार्लरको रिबट काटेर उद्घाटन गरेकी छिन् । सुन्धारास्थित काठमाण्डौं मलको चौथो तलमा रहेको अमिरा ब्युटी केयरको औपचारिक रुपमा उद्घाटन गरेकी हुन् ।

आजको युगमा महिलासँगै पुरुषले पनि आफ्नो सुन्दरतामा ध्यान दिइरहेको करिश्माले बताइन् । ब्यूटी पार्लर संचालिका अमिता तामाङ म्युजिक भिडियो मोडल समेत हुन् । उनले यसअघि रेष्टुरेन्ट व्यावसाय गरेकी थिइन् ।