ईंग्ल्यान्डविरुद्ध भारतको लज्जास्पद ब्याटिङ, ७८ रनमै समेटियो
काठमाडौं । ईंग्ल्यान्डविरुद्ध तेस्रो टेस्ट अन्तरगत पहिलो इनिङमा भारतले खराब ब्याटिङको नमूना प्रदर्शन गरेको छ । टस जितेर पहिले ब्याटिङ रोजेको भारत ७८ रनको झिनो स्कोरमा समेटियो ।
भारतले ४ रनको अवस्थामा अग्रपंतिका दुई विकेट गुमाएको थियो । केएल राउल शून्य र चेतेश्वर पुजारा १ रनमा आउट भएपछि भारतीय समर्थकको आशा थियो बिराट कोहलीमाथि । तर कोहलीले पनि कुनै चमत्कार देखाउन सकेनन् । ७ रन बनाएर कोहली पेभिलियन फर्किए ।
त्यसपछि पनि भारतको विकेट पतनको सिलसिलारोकिएन । ओपनर रोहित शर्मा र मध्यक्रमका अजिन्का रहानेबाहेक कुनै पनि ब्याट्सम्यानले दोहोरो अंकमा रन बटुल्न सकेनन् । रोहितले सर्वाधिक १९ र रहानेले १८ रन बनाएका थिए । भारतले १६ अतिरिक्त रन पाएको थियो ।
ईंग्ल्यान्डका तीव्र र मध्यम गतिका बलरहरु भारतीय ब्याट्सम्यानहरुमाथि पूर्णरुपमा हावी भएका थिए । कुनै पनि ब्याट्सम्यानले ईंग्ल्यान्डका बलरलाई खुलेर खेल्न सकेनन् । जेम्मी एन्डरसन र क्रेग ओभर्टनले आपसमा ३ विकेट बाँडे । ओली रोविन्सन र साम कुरानको खातामा दुई-दुई विकेट रह्यो । एन्डरसनले बिराट कोहली, चेतेश्वर पुजारा र केएल राहुलका महत्वपूर्ण विकेट ढालेका थिए ।
पाँच टेस्टको श्रृंखलामा भारत १-० ले अगाडि छ । पहिलो टेस्ट बराबरीमा सकिएको थियो भने दोस्रो टेस्टमा भारतले रोमाञ्चक जित हात पारेको थियो ।