कक्षा १२ र उच्चशिक्षा तहका परिक्षार्थीलाई अस्ट्राजेनेका खोप दिने सरकारको निर्णय

काठमाडौं । सरकारले कक्षा १२ र उच्च शिक्षाका परिक्षार्थीहरुलाई प्रवेशपत्रका आधारमा कोभिड–१९ विरुद्धको अस्ट्राजेनेका खोप दिने भएको छ ।

१८ वर्ष वा सो भन्दा बढी उमेर समूहका परीक्षार्थीहरुले राष्ट्रिय परिक्षा बोर्ड, प्राविधिक शिक्षा तथा व्यवसायीक तालिम परिषद्, विभिन्न विश्वविद्यालयहरू तथा प्रतिष्ठानबाट उपलब्ध गराइएको प्रवेश पत्रको आधारमा खोप दिईने मन्त्रालयले जनाएको छ ।

स्वास्थ्य मन्त्रालयले तोकेको खोपकेन्द्रमा गएर परीक्षार्थीहरुले कोरोनाविरुद्धको खोप लगाउन सक्नेछन् । जापानबाट उपलब्ध अष्ट्राजेनेका खोप कक्षा १२ का परीक्षार्थीलाई दुवै मात्राको खोप दिईने स्वास्थ्य राज्यमन्त्री उमेश श्रेष्ठले जानकारी दिएका छन् ।

कोभिड–१९ को उच्च जोखिमका कारण अन्तिम समयमा स्थगित गरिएको कक्षा १२ को परीक्षा भदौ अन्तिम सातादेखि सञ्चालन गर्ने तयारी राष्ट्रिय परीक्षा बोर्डले गरेको छ ।