चिनियाँ र अमेरिकी विदेशमन्त्रीबीच वार्ता : स्थायित्वका लागि तालिबानलाई सघाउन चीनको आग्रह

बेइजिङ । आतंकवाद तथा दोहोरो प्रवृत्तिविरुद्धको लडाइमा अफगानिस्तानलाई सघाउन चीनले अमेरिकालाई आग्रह गरेको छ । अमेरिकी विदेशमन्त्रीसँग सोमबार भएको टेलिफोन संवादमा चिनियाँ समकक्षी वाङ यीले यस्तो आग्रह गरेका हुन् ।

गत अगस्ट १६ मा दुई कूटनीतिज्ञबीच संवाद भएको दुई सातामै अफगान संकटबारे चर्चा भएको हो । अफगानिस्तानको घरेलु अवस्था आधारभूत रुपमै बदलिने क्रममा रहेको र तालिबानलाई निर्देशित गर्न सबै पक्ष एकजुट हुनुपर्ने विदेशमन्त्री वाङले बताएको ग्लोबल टाइम्सले जनाएको छ । खासगरि, यसमा अमेरिकी भूमिका महत्वपूर्ण हुने उनले बताएका थिए ।

‘अफगानिस्तानमा रहेका कट्टरपन्थीको उपस्थितीले अफगानिस्तान युद्धले कुनै उपलब्धी हासिल गर्न नसकेको तथ्यले प्रमाणित गरेका छन् । साथै, अमेरिकी र नेटो सेनाको फिर्तीले आतंकबादीलाई फाइदा पुग्न सक्छ’ वाङ यीले भनेका छन् ।

नयाँ अफगानिस्तान संचालनका लागि तालिबानलाई अन्तर्राष्ट्रिय समुदायसँग मिलेर साथ दिन अमेरिकाले भूमिका खेल्नुपर्ने पनि चिनियाँ विदेशमन्त्रीको भनाई छ ।

अमेरिकी विदेशमन्त्री एन्टोनी ब्लिंकेनले काबुलबाट सर्वसाधारणको उद्दारका लागि तालिबाने सहयोग सुनिश्चितता गर्नुपर्ने सहितको संयुक्त आवाज राष्ट्रसंघीय सुरक्षा समितिले प्रस्तुत गर्नुपर्ने धारणा राखेका थिए ।